الجواب المباشر
الذكاء الاصطناعي ما بيكتب إعلان ناجح. هو بيكتب بسرعة. والفرق بين نص ممتاز ونص للزبالة كله بالمدخلات اللي بتعطيه.
أي برومبت مفيد لازم يحمل ستة عناصر: الدور واللهجة، المنتج كنتيجة، الجمهور ووجعه، مستوى وعيه، القيود، والممنوعات. شيل واحد منهم وبترجّعلك نص بينفع لأي منتج بالدنيا، يعني ما بينفع لإشي.
ليش النص بيطلع عام
إنت شايف منتجك من جوّا: الميزة اللي تفرق، الاعتراض اللي بيتكرر، السبب اللي بيخلي حدا يدفع. الأداة ما بتعرف ولا واحد منهم إلا إذا كتبته.
«أصحاب متاجر» مش جمهور. الجمهور هو: صاحب متجر صرف على إعلانات شهرين وما إجت طلبيات وصار بيشك إنه المشكلة فيه. هاذ الوصف بيعطي الأداة إشي تشتغل عليه.
بدون توجيه، بيرجّعلك الصيغة الأكثر شيوعاً: «أفضل المنتجات بأعلى جودة». كل حدا بيحكيها، فما حدا بيصدّقها ولا بيوقف عندها.
هيكل البرومبت الصح
| العنصر | شو تكتب فيه |
|---|---|
| الدور واللهجة | كاتب إعلانات بيكتب بالعامية الفلسطينية |
| المنتج | النتيجة اللي بيوصلها، مش المواصفات |
| الجمهور | مين هم + أكبر وجع، بكلماتهم |
| مستوى الوعي | ما بيعرف المشكلة / بيعرفها / بيعرف الحلول / بيعرفك |
| القيود | أول 125 حرف، عنوان تحت 40 حرف، دعوة إجراء وحدة |
| الممنوعات | بلا أرقام مخترعة، بلا كلمات عامة، بلا وعود مبالغ فيها |
القيود مش تفصيل: الجزء اللي بيبين من إعلانك قبل «شوف أكثر» محدود، وشرحت هاذ بالتفصيل بمقال كيف تكتب نص إعلان بيبيع.
4 برومبتات جاهزة
انسخهم وعبّي الفراغات بتفاصيلك:
إنت كاتب إعلانات محترف بتكتب بالعامية الفلسطينية. المنتج: [المنتج + النتيجة اللي بيوصلها] الجمهور: [مين هم + أكبر وجع عندهم بكلماتهم] مستوى الوعي: [ما بيعرف المشكلة / بيعرفها / بيعرف الحلول / بيعرفني] المطلوب: 10 هوكات لإعلان ميتا، كل واحد جملة وحدة تحت 125 حرف. غطّي 5 زوايا، هوكين لكل زاوية: سؤال، رقم، قبل وبعد، غلط شائع، اعتراف شخصي. ممنوع: أرقام أو نسب مخترعة، وعود مبالغ فيها، وكلمات عامة زي «الأفضل» و«جودة عالية». اكتبهم بقائمة مرقّمة بدون شرح.
اكتب نص إعلان ميتا كامل بالعامية الفلسطينية. المنتج: [المنتج + النتيجة] الجمهور ووجعه: [وصف دقيق] العرض: [شو بياخد + السعر + شو يميّزه] الدليل: [رقم حقيقي أو كلام زبون، استعمله كما هو] البنية: هوك، وجع بكلمات الجمهور، الحل كنتيجة، الدليل، دعوة لإجراء وحدة. القيود: أول 125 حرف لازم يحكوا القصة لحالهم. العنوان تحت 40 حرف. ممنوع: تخترع أي رقم أو شهادة مش موجودين بالمدخلات فوق. إذا ما في دليل، اتركه فاضي.
هاذ نص إعلان شغّال عندي:
[الصق النص]
اعمل 4 نسخ اختبار. بكل نسخة غيّر عنصر واحد بس وخلي الباقي زي ما هو:
النسخة 1: بدّل الهوك.
النسخة 2: بدّل وصف الوجع.
النسخة 3: بدّل الدليل.
النسخة 4: بدّل الدعوة لإجراء.
تحت كل نسخة اكتب سطر: شو العنصر اللي تغيّر.
انتقد نص الإعلان هاذ كخبير إعلانات أداء:
[الصق النص]
افحص بالترتيب: هل الهوك بيوقّف التمرير؟ الوجع محدد ولا عام؟ العرض واضح؟
في دليل؟ الدعوة لإجراء وحدة؟
لكل نقطة: تقييم بسطر + إعادة صياغة مقترحة.
لا تجاملني. إذا النص ضعيف قول ليش بالضبط.
سلسلة أحسن من برومبت واحد
أغلب الناس بتكتب طلب واحد طويل وبتتوقع نص جاهز. الأفضل سلسلة، كل خطوة بتبني على اللي قبلها:
- افهم الجمهور: خلّيه يطلّع أوجاع واعتراضات محتملة، وإنت صحّح.
- زوايا البيع: 5 زوايا مختلفة للمنتج.
- هوكات: للزاوية اللي اخترتها (قوالب الهوكات هون).
- نص كامل: على الهوك الفائز.
- نسخ اختبار: بتغيير عنصر واحد كل مرة.
قبل ما تنشر
- افحص كل رقم وكل اقتباس: من وين إجا؟
- اقرأ النص بصوت عالي. لو حسيت إنه مترجم، أعد صياغته بلهجتك.
- انتبه لسياسات ميتا، خصوصاً بالصحة والتجميل والتمويل وصور «قبل وبعد».
- شيل أي جملة بتنطبق على أي منتج بالدنيا.
أخطاء شائعة
- تعطيه اسم المنتج بس وتتوقع إعلان.
- تنسى تحدد مستوى وعي الجمهور، فيطلعلك نص للناس الغلط.
- تاخد أول نتيجة بدون تعديل.
- تنشر أرقام ما فحصتها.
- تخلّيه يكتب بالفصحى وجمهورك بيحكي عامية.
الخلاصة
البرومبت الصح فيه ستة عناصر: دور ولهجة، منتج كنتيجة، جمهور ووجع، مستوى وعي، قيود، وممنوعات. اشتغل بسلسلة مش بطلب واحد، وافحص كل رقم قبل النشر. الأداة بتوفّرلك وقت الكتابة، بس الحكم والدليل ضلّهم شغلتك.
بدك برومبت مبني على أطر مجرّبة؟
«أسرار الأفكار الإعلانية» فيه 15 إطار كتابة، 40 هوك جاهز، خريطة مستويات الوعي، وبرومبت ذكاء اصطناعي جاهز مبني عليهم كلهم، يعني مدخلات جاهزة بدل ما تبنيها من الصفر.
شوف الدليل ←بدك حدا يراجع نصوصك الحالية ويحكيلك شو الناقص؟ احجز استشارة 60 دقيقة.
أسئلة متكررة
ليش النص الطالع من الذكاء الاصطناعي بيطلع عام؟
لأنه ما بيعرف منتجك ولا جمهورك، فبيرجّعلك المتوسط. الحل إنك تعطيه المنتج كنتيجة، والجمهور ووجعه بكلماته، ومستوى وعيه، والقيود.
شو لازم يكون بأي برومبت؟
ستة عناصر: الدور واللهجة، المنتج كنتيجة، الجمهور والوجع، مستوى الوعي، القيود، والممنوعات.
كيف أمنعه من اختراع أرقام؟
اكتب صراحة: استعمل بس الأرقام والشهادات اللي بالمدخلات، وإذا ما في دليل اتركه فاضي. وافحص كل رقم قبل النشر.
برومبت واحد ولا سلسلة؟
سلسلة: جمهور، زوايا، هوكات، نص، نسخ اختبار. كل خطوة بتبني على اللي قبلها والنتيجة أدق.